Ajenti mkuu wa kiongozi wa upinzani Raila Odinga katika uchaguzi wa urais wa Agosti 9 Saitabao Ole Kanchory amedai kuwa viongozi watatu wa Azimio waligharimu ushindi wao.
Katika filamu ya NTV inayotarajiwa kupeperushwa Jumapili, Desemba 12, iliyopewa jina la How Raila Lost, Kanchory anaeleza baadhi ya viongozi waliokuwa kiini cha sekretarieti ya kampeni ya Raila waliweka wazi nafasi ya Azimio ya kutwaa urais.
“Hatungeweza kupoteza uchaguzi huu ikiwa si kwa watu watatu, Junet Mohammed, Joe Mucheru, na Makau Mutua,” Kanchory alisema.
Ni katika waraka huo ambapo Mbunge wa Embakasi Mashariki Babu Owino, SG wa Jubilee Jeremiah Kioni na Kanchory watafunguka kuhusu fitina zilizomfanya Raila ashindwe na Rais William Ruto.
Kipande kidogo cha toleo hilo kinaonyesha Babu Owino akifichua jinsi alivyojaribu kumshawishi aliyekuwa Waziri wa Usalama wa Ndani Karanja Kibicho kumkamata Mwenyekiti wa IEBC Wafula Chebukati.
“Nilimwambia, jinsi mambo yanavyosonga tunahitaji kuchukua hatua haraka sana. Unajua Kibicho aliniambia nini, Babu Wacha vita,” Owino aliambia NTV.
Mbunge huyo aliendelea kutilia shaka uaminifu wa Kibicho na jukumu lake katika uchaguzi wa Agosti.
“Nikasema nini kinatokea na huyu mtu, alikuwa sehemu ya hili? Huyu mtu alipaswa kuwa mtu wetu lakini nini kinatokea?” alisema.
Owino alifichua kuwa alimwomba Kibicho amruhusu Makamu Mwenyekiti wa IEBC Juliana Cherera ndiye amtangaza Odinga kuwa mshindi.
“Nikamwambia no ni wewe kumkamata chebukati, au twende kwa marudio. Nikasema hii ilikuwa ni hali ya uwongo,” aliongeza.
Kanchory alitumia Twitter yake Jumamosi asubuhi akisema ufichuzi huo ni sehemu ya kitabu chake ambacho kitazungumza kwa ujasiri juu ya kile kilichosababisha Azimio kushindwa uchaguzi.
